انا كان مالي انا و مال التدوين و اللي بيدونوا مانا كنت قاعده في حالي بس هاقول ايه النصيب بقي قال و انا اللي قولت اهون علي الناس شوية و اتكلم في الحب و اللف لفه و لسه باقول يا هادي الاقي التاج في انتظاري لأ و ماتجيش غير منك انت يا اسامه هاقول ايه منك للي اكلت دراع جوزها بس عموماً مقبوله منك يا سيدي
انا بحب الصراحه اوي و هجاوب بمنتهي الصراحه استعنا علي الشقي بالله
إيه اللي هايحصل لإميلك لما تموت
بصراحه انا مافكرتش قبل كدا في الموضوع دا لانه مش هايبقي مهم بالنسبلي الايميل هايبقي ورايا حاجات اهم لازم اعمل حسابها قبل ماموت و بعدين يحصله اللي يحصله بقي
اسمك
قطر الندي اسم دا و لا مش اسم !!؟
اسم الدلع المشهور به وسط اصدقائك؟
بسيطه اصحابي بيقولوا فروله لكن فيه اسماء تانيه كتير لكن دا الاشهر
عمرك؟
عمري 27 سنه
برجك ؟
العقرب
مجال دراستك؟
علوم حاسبات / برمجيات
شخصيتك نوعها ايه ؟
هو السؤال غريب شويه و لا انا اللي بيتهيألي !!؟؟
بس ممكن نقول اني في العموم طيبه و بانسي الاساءه بسرعه
السفر بالنسبه ليك ؟
متعه فعلاً اياً كانت ظروف السفر او وجهته فعلاً باستمتع بكل لحظه فيه حتي الطريق علي رآي نجاة انا باعشق الطريق
المود بتاعك؟
حالياً محتاره شويه لكني محتفظه بهدوئي
وقت فراغك بتعمل ايه ؟
باطبخ و بتعلن حالة الطوارئ القصوي في البيت و المناطق المحيطه بيه و طول مانت قاعد تسمع صوت عربيات الاسعاف اللي بتشيل ضحايا العدوان و في الغالب بتنتهي باعلان عيلتي كلها اضراب عن الطعام و مطالبتهم للجمعيات و الهيئات الدوليه بالتدخل لمنعي من دخول المطبخ
الاكله المفضله؟
ورق العنب و الملوخيه حتي لو عشت عليهم بقيت حياتي مش هازهق
الصفات اللي اخدتها من بابا؟
الاحتفاظ بهدوء اعصابي اطول فتره ممكنه لكن لما انفجر ماشوف قدامي
الصفات اللي اخدتها من ماما؟
طيبة القلب و حسن الظن في التعامل مع اي شخص و دي حاجه باحترمها جداً
اكثر 6 حاجات بتكرها؟
الخيانه و لحظات الوداع و نكران الجميل و الخبث و الاستهبال و برنامج هاله شو
اكثر 6 حاجات بتحبها؟
الموسيقي و السينما و البحر و الهدوء و الحب و الاطفال
الشغل بالنسبه ليك ؟
استقلال مادي و احساس باني منتج مش مجرد مستهلك و اكيد مستقبل احسن
النت بالنسبه ليك ؟
وسيله لمواكبة العصر و بصراحه جزء مهم من حياتي و شغلي لكني ممكن استغني عنه لو لقيت بديل
امرر التاج لاكتر ناس انا بحب مدونتهم و باعتبرزيارتهم حاجه يوميه لازم اعملها ـ برايد صاحبة مدونتة عايزه اتجوز و ست البنات الزعروره و loin king
